కటిక చీకటిలో తచ్చాడుతుంటే
ఒక చిరుదివ్వెనైనాను

గ్రీష్మంలా వేగిపోతుంటే
చిన్ని శీతల పవనమైనాను

శిశిరం లా రాలిపోతుంటే
వసంతమై తిరిగొచ్చాను

కఠిన పాషాణం ల శిధిలమైపోతుంటే
ఒక శిల్పమై స్వరాగాలు పలికించాను

మంచుబిందువులా కరిగిపోతుంటే
వసుధ నయి వడ్డిపట్టాను

అలవై చెదిరిపోతుంటే
చెలియలి కట్టనై చెంత నిలిచాను

మౌనమై శూన్యం లోకి జారిపోతుంటే
మౌనిలా నీలో అర్ధనై పరమార్ధమై నిలిచాను!!